ILOILO CITY – Welcome sa siyudad sang Iloilo ang ginhingadlan nga drug-lord killer nga si C/Insp. Jovie Espenido, nga sa karon hepe sang Ozamiz City Police Office (ICPO).
Sa interview sang Bombo Radyo, ginpahayag ni Iloilo City Mayor Jed Patrick Mabilog nga mas makapaayo kun ma-assign sa Iloilo si Espenido agud makita sang police official ang ginahimo nga tikang sang city government sa kampanya batok sa iligal nga droga.
Suno sa alkalde, wala siya nahadlok kun ma-assign man sa Iloilo City si Espenido sa pihak sang natabo sa mga Parojinog sa Ozamiz.
Ginpanindugan ni Mayor Mabilog nga wala ini sang kaangtanan sa iligal nga droga gani wala ini sang dapat kahadlukan.
Una na ginpahayag ni C/Insp. Espenido nga luyag sini ma-assign sa Iloilo City kun mahatagan sang tiyansa.
Si Mayor Mabilog ang isa sa mga alkalde nga gintumod ni Presidente Rodrigo Duterte nga ginapahayag drug protector, nga ginpanginwala naman sang city mayor.