ILOILO CITY – Nakaalerto na ang mga airports kag seaports sa Western Visayas kasunod sang outbreak sang bird flu virus sa Pampanga.
Sa interview sang Bombo Radyo Iloilo, ginpahayag ni Dr. Nilo Lingaya sang Veterinary Quarantine Service sang Department of Agriculture (DA) Region 6, matapos ideklarar ang outbreak sang bird flu sa Luzon, gilayon nagpatigayon sang emergency meeting ang mga division chief sang DA sa rehiyon upod ang Regional Animal Disease and Coordinating Council.
Nakasugtan nga limitahan ang pagsulod sa Western Visayas sang mga buhi nga poultry kag mga poultry products ilabi na ang nagikan sa Luzon.
Dugang pa ni Dr. Lingaya, nagpahamtang na sang mga boot box sa mga nagapanguna nga puerto sa rehiyon agud mapunggan ang paglapta sang virus.
Magapakig-angot man ang Department of Agriculture sa Department of Trade and Industry (DTI) agud masiguro nga indi magsaka ang presyo sang mga poultry products sa pihak sang pag-eksido nga ginapatuman sang Department of Agriculture.