ILOILO CITY – Kadungganan para sa Vice President (VP) kag Chief Operating Officer (COO) for AM Division sang Bombo Radyo Philippines nga si Mr. Herman Z. Basbano nga kilalahon ini bilang outstanding Ilonggo sa ika-80 nga Charter Day sang Iloilo City.
Sa interview sang Bombo Radyo Iloilo, ginpahayag ni Bombo Herman nga nagapakita ini sang pag-asenso niya sa trabaho kag bilang isa ka indibidwal.
Isa ini ka blessing suno kay Bombo Herman kaangay sang nahatagan siya sang oportunidad nga makatrabaho sa Bombo Radyo kun sa diin nagsugod siya sa pinakanubo, amat-amat nga nagsaka ang posisyon kag nakabulig sa publiko kag sa network.
Suno kay Bombo Herman nga amu man ang national president sang Kapisanan ng mga brodkaster ng Pilipinas (KBP), bangud sa maayo nga training kag pag-ubay ni Dr. Rogelio Florete, chairman sang Bombo Radyo Philippines, pamilya Florete kag mga kaupdanan sa network lakip na ang naatubang nga mga pagpanghangkat, madamo siya sang natun-an agud malab-ot kun sa diin man siya subong.
Ang broadcast profession suno kay Mr. Basbano ang isa ka pamaagi agud makaserbe sa tawo apang mahimo man mangin paagyan para mag-asenso ang kabuhi.
Kinahanglan lang suno kay Mr. Basbano nga mapabilin ang kredibilidad, himuon ang insakto, sakripisyo, kag magpamati sa mga may eksperyensiya na sa propesyon.
Labaw sa tanan, dapat nga mapabilin nga nagadapat sa duta ang mga tiil ukon mangin mapainubuson kag makabulig sa tawo.
Ang nasambit nga pagkilala ang magaserbe nga inspirasyon kay Bombo Herman kag sa mga miyembro sang fourth estate agud kay-uhon ang trabaho.
Pila sa mga proyekto kag adbokasiya sini amu ang pagduso sang press freedom kag freedom of expression, pagtatap sang dunang-manggad gani ginlunsyar ang Oplan Broadcastreeing sang KBP, presidential kag vice presidential debate sang 2016 election election kaupod ang Commission on Election.
Ang kadalag-an nga ini suno kay Mr. Basbano ang iya nga nalab-ot sa bulig sang Bombo Radyo kag sa pagpati sa pagkamapainubuson, paghimakas, pagkatampad kag pagpasalamat ukon pagkilala sa mga grasya nga nabaton.
Ginpasalamatan ni Mr. Basbano ang iya pamilya, si Dr. Rogelio Florete, chairman sang Bombo Radyo Philippines kag ang pamilya Florete, sa iya kadalag-an sa kabuhi.