ILOILO CITY – Ginmandu ni PNP chief Director General Ronald dela Rosa sa tanan nga regional kag city directors sa bug-os nga pungsod nga sipaon sa puwesto ang mga chief of police nga wala naga-ubra sang trabaho ilabi na sa kampanya batok sa iligal nga sugal.
Sa interview sang Bombo Radyo Iloilo, ginpahayag sang PNP chief nga wala sang kinamatarong nga magpabilin sa puwesto ang mga wala naga-ubra sang ila trabaho.
Dako nga panghangkat suno kay Dela Rosa para sa mga pulis, ang pagtapna sang illegal gambling.
Suno kay Dela Rosa, mismo ang mga lokal nga opisyal kaangay sang mga alkalde kag mismo mga pulis, ang nagahatag proteksyon sa mga operator sang iligal nga sugal.
Dako ang nadula sa kaban sang gobyerno bangud sang iligal nga sugal, suno kay Dela Rosa.
Ginpahayag naman sa Bombo Radyo ni Iloilo Provincial Police Office (IPPO) spokesman Supt. Aaron Palomo nga nakasumiter na sila sang certification nga illegal gambling free ang bug-os nga probinsiya.
Ginpahayag ni Palomo nga magluwas sa kinahanglan nga sertipikasyon, ila man naistorya ang mga ginatudlo nga financier sang illegal gambling kag nagpangako man ang mga ini nga untaton na ang iligal nga buluhaton.