ILOILO CITY – Emosyunal nga nagpangayo sang pasaylo paagi sa Bombo Radyo si Iloilo City Councilor Eduardo Penaredondo, sa mga nainsulto sa ginhimo nila ni Vice Mayor Jose Espinosa III sang gintalakay sa session sang City Council ang pag-obliga sa mga mall diri sa Iloilo City nga may yara sang breastfeeding room.
Nahibaluan nga ginhimo nga kaladlawan sang duha ka opisyal ang breastfeeding sang ginpahayag sang bise alkalde nga madamo nga amay ang indi gusto i-breastfeed ang ila anak bangud luyag nila ini masolo.
Sa interview sang Bombo Radyo Iloilo, ginpahayag ni Councilor Penaredondo nga nagapangayo ini sang pasaylo kag indi niya intensyon nga makasakit sang balatyagon.
Paathag sini, iya nabungat ang tinaga nga “supsop” bangud nadumduman sini ang nakit-an nga bata sa lactating room sang isa ka mall nga nagasupsop sang beberon nga wala sang unod, apang na-realize nga wala nagakadapat ang gin-gamit sini nga tinaga.
Naghibi ang konsehal samtang nagapangayo sang pasaylo bangud sa gin-akto sini, daw kaangay suno kay Penaredondo nga gin-insulto man sini ang iya iloy kag lola.
Kadungan sini ginpahayag ni Konsehal Penaredondo nga luyag na lang sini nga mag-resign bilang majority floor leader sang Iloilo City Council.