ILOILO CITY – Na-trauma ang pila ka mga Pinoy nga yara mismo sa malapit sa lugar kun sa diin gina-arado sang nagahagunos nga van ang mga tawo sa Las ramblas sa Barcelona, Spain.
Ginpahayag ni Girlie Vicena Oehlert nga tumandok sang Pagsanga-an, Pavia, Iloilo, gikan sila sa Denmark upod ang iya pamilya kag nagbakasyon lang kuntani sa Barcelona.
Ang hotel kun sa diin sila nagatinir ang malapit gid lamang sa Las Ramblas.
Suno kay Oehlert, nagkadto sila sa beach kag pabalik na kuntani sa Hostel Lima sang natabo ang pagpang-atake.
Ginkordon ang lugar kun sa diin wala ginapahanugutan nga magsulod ang mga salakyan, samtang gin-alalayan pa sila pabalik sa hotel.
Ginpahayag ni Oehlert nga indi sini malipatan ang nasambit nga bakasyon bangud sa baylo nga mag enjoy, kahadlok ang ila nabatyagan.
Nahibaluan nga ang Las Ramblas ang sikat nga destinasyon para sa mga turista kun sa diin mabakal ang mga chocolates kag souvenirs.