Pagdeklarar sang mga barangay nga drug-cleared, indi pagpadali-an – PDEA

ILOILO CITY – Indi pagpadali-an sang Philippine Drug Enforcement Agency (PDEA) Region 6 ang pagdeklarar sa mga barangay nga drug-cleared.
Ini ang ginpasiguro sang bag-o nagpungko nga direktor sang PDEA-6 nga si Wardley Getalla.
Sa interview sang Bombo Radyo Iloilo, ginpahayag ni Getalla nga indi sila magdeklarar sang isa ka barangay nga drug-cleared para lang makakuha sang media mileage.
Dugang pa sang opisyal, magasugod naman ang ahensiya sa paghatag sang orientation sa mga barangay kun paano himuon ang proseso sang drug-clearing.
Suno kay Getalla, indi pagpabudlayan ang mga barangay para madeklarar nga drug-free, sa baylo buligan ang mga ini.
Repasuhon naman ni Director Getalla ang mga barangay nga una na gindeklarar nga drug-cleared.