ILOILO CITY – Nagalaum ang oposisyon nga magbunga ang imbestigasyon sang Senado sa kamatayon sang 17-anyos nga estudyante nga si Kian Lloyd delos Santos sa anti-drug operation sang kapulisan sa siyudad sang Caloocan.
Sa interview sang Bombo Radyo Iloilo, ginpahayag ni Magdalo Rep. Garry Alejano nga kuntani mangin transparent ang imbestigasyon sang Senado.
Nagakahangawa ang kongresista nga magpareho man ini sa imbestigasyon sang Senate Blue Ribbon Committee nga gin-absuwelto kuno gilayon ni Sen. Richard Gordon si Presidente Rodrigo Duterte.
Suno kay Alejano, ang tinutuyo dapat sang hiwaton nga imbestigasyon amu nga dapat mapahibalo sa kapulisan nga magsunod sa proseso sa patigayunon nga mga drug operation.
Nagapati naman ang kongresista nga nabatyagan sang Senado ang pressure sang publiko nga nagakondenar sa kamatayon ni Delos Santos rason nga nagpatigayon sang imbestigasyon.