ILOILO CITY – Isumite subong nga adlaw sang oposisyon sa Kamara ang resolusyon para imbestigaran ang kamatayon ni Kian Lloyd delos Santos, 17, sa drug operation sang Caloocan police.
Ginpahayag sa Bombo Radyo Iloilo ni Magdalo Rep. Garry Alejano nga magasapol subong nga adlaw ang oposisyon kag pirmahan ang resolusyon nga ginhimo ni Akbayan partylist Rep. Tom Villarin nga nagapanawagan sa manubo nga panalgan sang Kongreso agud imbestigaran ang natabo kay Delos Santos.
Ekspresyon man nila ini suno kay Alejano sang pagkondenar sa gindangatan ni Kian.
Apang wala na nagalaum si Alejano nga mahatagan sang igtalupangod sang Kongreso ang ila ginahingyo.
Pila na ka resolusyon suno sa kongresista ang ila nga gin-submit para imbestigaran sang Kamara ang extra-judicial killings apang nagapabilin suno kay Alejano nga mahipos ang mga kaalyado sang Duterte administration kag ginaprotektahan si Presidente Rodrigo Duterte.