ILOILO CITY – Ginapatihan nga biktima sang summary execution ang duha ka lalaki nga nasapwan patay sa Barangay Tiring-Tabucan, Cabatuan, Iloilo.
Ginkilala ang mga biktima nga sanday Jonathan Penafiel sang R. Mapa St., Mandurriao, Iloilo City kag Michael Malones sang Barangay Magdalo, La Paz, Iloilo City.
Si Penafiel ang nag-angkon sang pilas sang pagkaluthang sa dughan, abaga, likod, butkon kag may pilas man sa ulo apang indi pa matumod kun ini ang bangud sa pagkaluthang.
Pilas naman sa idalom sang dulunggan, to-o nga kamot, butkon, siko kag duha ka pilas sa dughan ang naangkon ni Malones.
Sa interview sang Bombo Radyo Iloilo, ginpahayag ni S/Insp. Solien Domingo, chief of police sang Cabatuan Municipal Police Station, nga sa inisyal nga imbestigasyon, nagaguwa nga may isa ka grey nga pick-up ang madasig nga nagburhot padulong sa Iloilo Airport matapos mabatian ang sunod-sunod nga lupok sang armas luthang.
Lunsay naman ginpanginwala sang pamilya sang mga biktima nga may kaangtanan ang mga ini sa iligal nga droga.