ILOILO CITY – Mixed emotions ang isa sa 12 ka mga finalists sa Bombo Music Festival apisar nga pila pa ka bulan antes ang Grand Performance Night.
Sa live interview sa studio sang Bombo Radyo Iloilo, ginpahayag ni Adrian Vicencio sang Valderrama, Antique kag composer sang ambahanon nga “Kiss Broken Hearts Goodbye”, nagasamo nga excitement kag nerbyos ang iya nabatyagan.
Madugay na niya nga komposisyon ang “Kiss Broken Hearts Goodbye”.
Suno pa kay Vicencio, gin-compose niya ang kanta sang nagbulagay sila sang iya sadto nga kahagugma kun sa diin apisar nga palangga, kinahanglan nila magbulagay.
Nagahibi pa ini samtang ginasulat ang kanta apang ginhambal sa kaugalingon nga kinahanglan niya mag-move on kag ini ang iya inspirasyon.
Kun nagasulat sang kanta, gina-isolate ni Vicencio ang kaugalingon kag mas gusto ang malinong nga lugar.
Nahibaluan nga nagikan sa pamilya sang mga musician si Vicencio kun sa diin gikan sa iya mga lolo kag lola, makahibalo magtukar sang instrumento samtang miyembro man ini karon sang isa ka banda.
Nagserbe man nga interpreter si Vicencio sang ambahanon nga “Tokhang” nga finalist sa Ilonggo Music Festival sang nakaligad nga tuig.
Ang mga musical influence ni Vicencio amu sanday Rod Stewart, Bryan Adams, Nelson del Castillo kag handum sini nga maka-angkon sang album sang mga orihinal nga komposisyon.