ILOILO CITY – Ginkalipay ni Iloilo City Mayor Jed Patrick Mabilog ang deklarasyon ni Presidente Rodrigo Duterte nga indi na “hot bed” sang iligal nga droga ang Iloilo.
Apang sa interview sang Bombo Radyo Iloilo, ginpahayag sang alkalde nga wala ini nagakahulugan nga dapat mangin kampante ang siyudad.
Nahibaluan nga sa iya press conference sang Lunes sang gab-i, ginpahayag ni Presidente Duterte nga indi na madata ang iligal nga droga sa Iloilo matapos napatay ang drug lord nga si Melvin Odicta Sr.
Suno pa sa alkalde, pasangkaron pa sang city government ang anti-drugs campaign kag magapabilin ini nga top priority.
Ginpasalamatan ni Mabilog ang PNP, PDEA kag iban pa nga stakeholders sa madinalag-on nga kampanya batok sa iligal nga droga ilabi na nga nakalab-ot na sa igtalupangod ni Presidente Duterte ang ginahimo nga lihok sang siyudad.
Nahibaluan nga masami ginatawag sang Presidente nga “bedrock of drugs” kag “most shabulized city” ang Iloilo.