ILOILO CITY – Nadakpan na sang Criminal Investigation and Detection Group (CIDG) Region 6 ang ginakabig nga sub-group leader sang Prevendido Drug Syndicate Group.
Ginserbe sang CIDG ang search warrant batok kay Ricardo Trabuco Jr. alyas “Sixby”, 41, sang Carmen J. Ledesma Village, Barangay Tacas, Jaro, Iloilo City kaina sang kaagahon.
Nakuha gikan kay Trabuco ang Norinco .45 caliber pistol, apat ka mga magazines, 26 ka rounds sang bala, holster kag bulutangan sang magazine.
Si Trabuco ang ginapahayag nga katapo man sang Bolivar Drug Group nga naga-operate man diri sa Iloilo.
Ginpahayag sa Bombo Radyo ni Supt. Julius Jacinto, pinuno sang CIDG-6, magluwas sa iligal nga droga, ginagamit man si Trabuco nga gun for hire.
Sa karon yara na sa kustodiya sang CIDG ang naaresto nga suspek.