ILOILO CITY – Wala malingkang ang pamilya ni Iloilo City Mayor Jed Patrick Mabilog kasunod sang mando ni Presidente Rodrigo Duterte nga ipaidalom sila sa lifestyle check.
Ini matapos ginpahayag sang Presidente nga mala-palasyo ang tatlo ka panalgan nga puluy-an sang alkalde sa Barangay Tap-oc, Molo, Iloilo City nga ginapahayag balor P3 million.
Sa interview sang Bombo Radyo Iloilo sa misis ni Mayor Mabilog nga si Maria Victoria, ginpahayag sini nga bukas sila sa ano man nga lifestyle check.
Wala sila sang ginatago sa publiko suno kay Mrs. Mabilog kag bukas ang iya puluy-an sa sin-o man nga luyag mag-imbestiga.
Ginpanindugan ni Mrs. Mabilog nga ang balay nila ang resulta sang pila ka tuig niya nga pagtrabaho sa Canada bilang accountant kun sa diin nangin Vice President for Finance kag Comptroller ini sang isa ka geodetic engineering firm sa Calgary.
Ginpahayag ni Mrs. Mabilog nga indi palasyo ang iya balay kundi matahom lang ang architectural design nga iya ginsunod sa disenyo sang mga puluy-an sa Canada.
Indi dalagko ang tatlo ka hulot kag ang makita nga tore sa ila puluy-an ang kabahin lang sang disenyo kag indi mahimo sakaan.
Wala sila sang jacuzzi ukon swimming pool sa ila 200 square meters nga balay nga nahamtang sa sulod sang compound sang pamilya Mabilog.
Kagab-i ginbuksan sang pamilya Mabilog sa Bombo Radyo ang ila puluy-an agud ipakita kun may nagbag-o sa ila balay sang ini ang ginbuksan sa media sang nakaligad nga tuig.