ILOILO CITY – Ginkumpirma ni Iloilo Governor Arthur Defensor Sr. ang pagsaylo sini sa administration party nga PDP-Laban.
Ini kasunod sang pagpakigsapol sang gobernador kahapon kay Senate President Koko Pimentel.
Sa exclusive interview sang Bombo Radyo sa gobernador, ginpahayag sini nga kaupod pa nila ni Pimentel sa meeting si Iloilo City Rep. Jerry Trenas nga natabuan man sa lugar bangud sang meeting sini sa Commission on Appointments.
Gin-athag sang gobernador nga wala siya sang ginhingyo nga kabaylo sa pagsaylo sang partido.
Nangin maayo man suno kay Defensor ang paglisensiya sini sa mga lideres sang Liberal Party nga sanday Sen. Franklin Drilon kag anay LP standard bearer Mar Roxas.
Sa masunod nga semana pa mahibaluan suno sa gobernador kun san-o ini pormal nga masumpa sa PDP-Laban.
Apang ginahingyo sang gobernador nga dapat magtambong sanday Pimentel kag House Speaker Pantaleon Alvarez sa iya pagsumpa.
Kumpiyansa naman ang gobernador nga kadam-an sang mga alkalde sa 42 ka mga banwa sa Iloilo ang maga-upod sa iya sa PDP-Laban.