ILOILO CITY – Napaslawan ang National Bureau of Investigation (NBI) Region 6 ngamahalughog ang bilog nga puluy-an ni Iloilo City Mayor Jed Patrick Mabilog sa Barangay Tap-oc, Molo, Iloilo City.
Sa ginpatigayon nga inspeksyon, tubtob sa ground floor lang sang tatlo ka panalgan nga puluy-an ang nasulod sang lima ka miyembro sang NBI team nga ginpangunahan nanday special investigators John Catipunan at Arnold Diaz.
Ini apisar nga ginbuksan sang utod ni Mayor Mabilog nga si JV Mabilog ang balay sang alkalde para libre nga mag-inspeksyon ang NBI apang ginpangitaan sang dokumento pero wala sang may naprisinta.
Apang mismo ang NBI ang nagdesisyon nga indi na magsaka sa ika-duha kag ika-tatlo nga panalgan sang balay bangud sa presensiya sang media kag mga supporters ni Mabilog.
Suno sa NBI, sikreto kuntani ang nasambit nga inspeksyon rason nga ginkakibot sang mga ini kun paano natiktikan sang media.
Ginkuhaan naman sang laragway sang NBI ang puluy-an ni Mabilog kag ang mga salakyan sini sa garahe.
Ini ang ginalakipan sang duha ka Toyota Innova, isa ka Toyota Prado kag isa ka Toyota Camry.
Ang tikang sang NBI ang kasunod sang mando ni Presidente Rodrigo Duterte nga ipaidalom sa lifestyle check si Mayor Mabilog.
Madumduman nga gintawag sang Presidente nga palasyo ang puluy-an ni Mabilog, nga hugot naman nga ginpanginwala sang alkalde.