ILOILO CITY – Naalarma ang pamilya ni Iloilo City Mayor Jed Patrick Mabilog sa ginpatigayon nga inspeksyon sang National Bureau of Investigation (NBI) sa puluy-an sang alkalde sa Barangay Tap-oc, Molo, Iloilo City.
Ginpahayag sa Bombo Radyo Iloilo ni Jay Victor Mabilog, utod sang alkalde, nagakabalaka sila sa masunod nga tikang sang mga otoridad.
Ginpangitaan nila sang nagakaigo nga dokumento ang NBI kaangay sang search warrant apang wala sang may ginpakita.
Sa bahin sang NBI, ginpahayag sang mga ini nga may direktiba sila nagikan sa NBI central office apang ila ginpaiway ang pagsaka sa bilog nga balay bangud sang presensiya sang media.
Ginkatingala naman sang NBI kun paano natiktikan sang media ang nasambit nga inspeksyon nga sikreto kuntani suno sa ahensiya.
Apang magluwas sa media, nag-abot man sa puluy-an ni Mabilog ang iya mga supporters, malapit nga mga abyan kag ang legal counsel sini.
Nahibaluan nga wala sa karon sa siyudad sang Iloilo si Mabilog bangud nga sa Japan ini para sa isa ka business trip.
Suno naman sa utod sang alkalde, wala siya sang ideya kun sa diin karon ang mag-iloy ni Mayor Mabilog.