ILOILO CITY – Nagpatigayon sang prayer rally ang mga tagasuporta ni Iloilo City Mayor Jed Patrick Mabilog kahapon sang hapon sa atubang sang Iloilo City Hall.
Kasunod ini sang ginapahayag nga pamahog sang Duterte administration sa alkalde sang siyudad sang Iloilo.
May mga senior citizens, kabataan kag kadam-an mga empleyado sang Iloilo City Hall.
Ginabanta nga nagalab-ot sa 500 ka mga tawo ang nagbuylog sa prayer rally.
Gin-umpisahan ini sa misa sa San Jose Parish antes nagtipon sa Plaza Libertad kun sa diin ginpatigayon ang candle lighting kag liwat nga pagpangamuyo.
Ginahandum sang mga ini ang kalinong para sa siyudad sang Iloilo kag proteksyon para sa alkalde.
Suno sa mga organizers, himuon nila ang “prayer for peace” kada Biyernes para ipakita ang suporta kay Mabilog.