ILOILO CITY – Nagakahangawa ang pamilya ni Iloilo City Mayor Jed Patrick Mabilog sa ila seguridad, kasunod sang ginpatigayon nga inspeksyon kahapon sang National Bureau of Investigation (NBI) sa puluy-an sang alkalde sa Barangay Tap-oc, Molo, Iloilo City.
Sa interview sang Bombo Radyo Iloilo, ginpahayag ni Jay Victor Mabilog, utod sang alkalde, nahadlok sila para sa ila seguridad, kasunod sang mando ni Presidente Rodrigo Duterte nga ipaidalom sa lifestyle check ang alkalde.
Suno kay Jay Victor, nagakabalaka sila nga magpatigayon sang raid ang mga otoridad sa indi kinaandan nga oras kaangay sang kaagahon, ukon sudlon ang balay sang alkalde ano man nga oras nga gustuhon sang mga otoridad.
Ginakahangaw-an nila suno kay Jay Victor nga magresulta sa madugo nga insidente ang ano man nga tikang sang mga otoridad.
Kadungan sini nagpanawagan ang manghod ni Mayor Mabilog sa mga otoridad sang courtesy ukon magdala sang nagakaigo nga mga dokumento antes sudlon ang balay sang alkalde.
Ini matapos nga wala sang naprisinta nga bisan search warrant ang mga katapo sang NBI Region 6 nga nag-inspeksyon sa puluy-an sang alkalde kahapon nga nagpatigayon sang inspeksyon.