ILOILO CITY – Gindeklarar ni Police Regional Office 6 (PRO6) nga “mission accomplished” matapos napatay ang top drug lord sang Western Visayas nga si Richard Prevendido kaupod ang anak nga si Jason, sa operasyon sang mga otoridad sa ginaarkilahan sini nga balay sa Landheights Subdivision, Balabago, Jaro, Iloilo City.
Ginpahayag ni PRO-6 director C/Supt. Cesar Hawthorne Binag nga gilayon nila ginpahibalo kay PNP chief Police Director General Ronald dela Rosa ang nasambit nga operasyon.
Si Prevendido ang kalakip sa national target sang PNP kag High Value Target Level 3 sa listahan ni Presidente Rodrigo Duterte.
Ginbuyagyag ni C/Supt. Binag nga mismo ang upod ni Prevendido sa grupo ang nagtudlo sang ginapanaguan sang drug lord.
Ang kaupod ni Prevendido ang gin-recruit sang otoridad bilang action agent sa gindihon nga plano para dakpon ang drug lord.
Ang madinalag-on nga operasyon ang produkto suno kay Binag sang ginpasangkad nga intelligence gathering kag suporta sang komunidad.
Dako ang nabulig suno kay Binag sang P1.1 million nga reward money para madakpan si Prevendido.