Pagkamatay ni Prevendido, magabag-o sa reputasyon sang Iloilo; effort ni Mabilog makita – PNP chief

ILOILO CITY – Bag-uhon ang reputasyon sang Iloilo, sang kamatayon sang top drug lord sa Western Visayas nga si Richard Prevendido.
Sa interview sang Bombo Radyo Iloilo, ginpahayag ni PNP chief Police Director General Ronald dela Rosa nga makabulig ini para mabag-o ang imahe sang siyudad nga una na gintawag ni Presidente Rodrigo Duterte nga “most shabulized city” kag “bedrock of illegal drugs”.
Suno kay Dela Rosa, mangin dalan man ang kamatayon ni Prevendido para makilala ang mga ginahimo ni Iloilo City Mayor Jed Patrick Mabilog sa kampanya batok sa iligal nga droga.
Dugang pa sang PNP chief, ang kamatayon ni Prevendido ang pamatuod nga madamo sang mapisan nga mga pulis sa Iloilo nga wala lang mahatagan pagtamod.
Gindayaw sini ang Regional Intelligence Unit sang Police Regional Office 6 mangin ang Iloilo Provincial Police Office (IPPO) kag Iloilo City Police Office (ICPO) sa pag-neutralize kay Prevendido.
Dako man ang epekto suno kay Dela Rosa, sang kamatayon ni Prevendido, sa kampanya batok sa iligal nga droga.
Sa lima ka mga drug lords nga natumod sa Western Visayas, si Prevendido lang ang wala mag-surrender suno sa PNP chief.
Apang ang sala lang ni Prevendido suno sa Dela Rosa, nagpati gid ang drug lord sa iya anting-anting nga wala man makaluwas sa iya.