ILOILO CITY – May ginasundan na nga impormasyon ang mga otoridad para madakpan ang sunod nga target sang Police Regional Office 6 (PRO-6) nga si Ernesto “Erning” Bolivar.
Si Bolivar ang lider sang Bolivar Drug Group nga sub-group sang napatay nga drug lord nga si Richard Prevendido.
Ginpahayag sa Bombo Radyo ni Police Regional Office 6 (PRO-6) director C/Supt. Cesar Hawthorne Binag nga karon nga wala na si Prevendido, naka-focus ang kapulisan kay Bolivar kag mangin sa lider sang Balumi Drug Group nga naga-operate sa Fifth District sang Iloilo.
Sa interview sang Bombo Radyo Iloilo, ginpahayag naman ni Chief Insp. Bonifacio Alabe, hepe sang Pototan Police Station, sumugod sang nadakpan sang 2014, wala na namonitor sa Pototan si Bolivar nga nagapuyo sa Barangay Ginacas sa amu nga banwa.
May balay man si Bolivar sa distrito sang Jaro.
Santu sa intelligence information sang kapulisan, padayon ang pagbaligya ni Bolivar sang iligal nga droga.
Bulan sang Setyembre sang nakaligad nga tuig, nangin subject sang buy bust operation si Bolivar apang nakapalagyo.
Suno kay Alabe, malapad ang operasyon sang grupo ni Bolivar.
Sakop sini ang third kag fourth district sang Iloilo sa operasyon sang iligal nga droga.
Ang mga tinawo ni Bolivar ang yara gid sa Pototan suno kay Alabe.
Direkta man nga may koneksyon si Bolivar sa napatay nga drug lord nga si Richard Prevendido kun sa diin ini nagakuha sang supply sang droga.