ILOILO CITY – Nagpaathag ang tag-iya sang balay sa Balabago, Jaro, Iloilo City kun sa diin nagpanago ang top drug lord sa Western Visayas nga si Richard Prevendido.
Sa exclusive interview sang Bombo Radyo Iloilo, ginpahayag ni Salve Boridas, nga wala siya sang ihibalo nga si Prevendido ang nag-arkila sa iya balay.
Matapos nga ginbaha sang 2008 sang maglaslas ang bagyo Frank, ginpa-renovate ang balay kag ginpaarkilahan sa iban bangud nga indi na nila gusto istaran.
Isa ka certain Mr. Gadeon ang nagpakig-angot sa iya para mag-arkila sang balay matapos siya nag-post sang karatula sa entrance sang subdivision nga “for rent” ang balay.
Suno kay Boridas, nagkitaay sila ni Gadeon sa entrance sang subdivision kag nagsugtanay sa arkila.
Ang tug-an sa iya ni Gadeon nga duha ka bulan nga arkilahan ang balay kag ginbayaran siya sang P30,000.
Bangud masako suno kay Boridas, wala naman niya ginkadtuan ang balay.
Ginpanindugan ni Boridas nga wala ini sang kaangtanan sa drug lord nga si Prevendido bangud ang tuyo man lang niya ang makaangkon sang dugang nga incom paagi sa pagpaarkila sang iya balay.