ILOILO CITY – Ginpasidunggan sang Police Regional Office 6 (PRO-6) ang 32 ka mga police personnel nga nangamot sa operasyon batok sa top drug lord sang Western Visayas nga si Richard Prevendido sa Barangay Balabago, Jaro, Iloilo City sang Biyernes sang gab-i.
Gin-award sa nasambit nga mga pulis ang Medalya ng Kagalingan ukon Medal of Merit sa nasambit nga mga pulis.
Suno kay Police Regional Office 6 director C/Supt. Cesar Hawthorne Binag, exemplary ang performance nga ginpakita sang mga police personnel.
Ang mga natungdan ang katapo sang Regional Intelligence Division, Iloilo Police Provincial Office, Special Weapons and Tactics Team (SWAT) sang Iloilo City Police Office kag ang Jaro Police Station.
Hatagan naman sang pagkilala ni Iloilo Governor Arthur Defensor Sr. ang mga katapo sang Iloilo Provincial Police Office (IPPO) nga nakabulig sa pag-neutralize kay Prevendido.
Kadungan sang flag raising ceremony kaina sang aga sa Iloilo Provincial Capitol, gin-anunsyo sang gobernador nga hatagan sang cash reward ang mga katabo sang IPPO nga kabahin sang operasyon batok kay Prevendido.
Magapasar man sang resolusyon ang gobernador paagi sa Sangguniang Panlalawigan para kilalahon ang bulig sang mga personnel sang IPPO nga madakpan ang drug lord.
Gindayaw ni Defensor ang IPPO ilabi na ang suno diri outstanding participation kag performance ni IPPO director S/Supt. Marlon Tayaba nga nagserbe ground commander sang ginpatigayon ang operasyon batok kay Prevendido.
Gintawag sang gobernador nga exciting weekend ang kamatayon ni Prevendido.
Nabuhinan na suno kay Gov. Defensor ang problema batok sa iligal nga droga sa pagkapatay ni Richard Prevendido.