ILOILO CITY – Gindepensa sang kampo ni Iloilo City Mayor Jed Patrick Mabilog ang kapaslawan sang alkalde nga makabalik sa Pilipinas apisar una na na-report nga sa Miyerkules pa ini mapauli sa pungsod.
Sa interview sang Bombo Radyo Iloilo, ginpahayag ni Atty. Mark Piad, legal counsel kag spokesperson ni Mayor Mabilog, yara sa Malaysia ang alkalde para magtambong sa United Urban Environment Accords Summit nga magadugay tubtob Setyembre 9.
Nagikan sa Japan kun sa diin ini nagtambong sa international forum, nagdiretso sa Malaysia si Mabilog.
Sang Miyerkules lang nabal-an ni Atty. Piad ang angot sa summit sa Malaysia kun sa diin isa sa mga speaker si Mabilog kun sa diin topic sini ang Iloilo River.
Una na ginpanindugan sang kampo ni Mabilog nga wala sang plano nga magpalagyo ang alkalde sa tunga sang ginapangatubang karon nga isyu.
Dugang pa ni Piad, Agosto 17 pa gin-aprubahan ang authority to travel ni Mayor Mabilog.