ILOILO CITY – Negatibo ang resulta sang raid sa puluy-an ni Maasin Vice Mayor Francis Amboy sa Confesor Subdivision, Barangay Mabini sa nasambit nga banwa kaina sang kaagahon.
Santu sa search warrant, mga armas ang target sang katapo sang Iloilo Provincial Police Office (IPPO) sa ginpatigayon nga raid.
Lakip sa mga armas nga ginaalegar ginapanag-iyahan sang bise alkalde amu ang kalibre .45 nga armas, 9mm pistol kag nagkalain-lain nga bala.
Apang wala sang may narekober ang mga katapo sang kapulisan.
Si Vice Mayor Amboy ang isa sa ginhingadlan ni Presidente Rodrigo Duterte nga narco-politician sa Iloilo.
Kampante na ang pamatyag ni Vice Mayor Amboy matapos ang ginpatigayon nga raid.
Sa interview sang Bombo Radyo, ginpahayag sang bise alkalde nga indi malikawan nga ginakulbaan siya bangud sang nagakatabo subong ilabi pa nga yara siya sa narco-list ni Presidente Duterte.
Nahibaluan nga negatibo ang resulta sang raid sa puluy-an sang bise alkalde.
Suno kay Amboy, isa lang ang iya armas kag ini ang 9 mm pistol nga wala niya ma-renew ang lisensiya rason nga iya na gin-surrender sa mga otoridad.
Wala man siya sang bodyguard suno sa bise alkalde nga posible magdala sang mga armas.
Ginpanginbulahan naman ni Vice Mayor Amboy ang mga katapo sang Iloilo Provincial Police Office sa matawhay nga raid.
Suno sa bise alkalde, ginsunod sang kapulisan ang proseso sa pagpatigayon sang raid kag may presensiya sang barangay officials.
Malayo ini suno sa bise alkalde sa makit-an sa ginahimo sang iban nga kapulisan kun magpatigayon sang raid.