ILOILO CITY – Padayon nga ginakilala sang Philippine Army ang identity sang miyembro sang New People’s Army (NPA) nga nasapwan sa Barangay Canawilihan, Janiuay, Iloilo.
Ini kasunod sang naglunad nga engkuwentro sa tunga sang tropa sang gobyerno kag rebelde nga grupo sa nasambit nga lugar.
Sa interview sang Bombo Radyo Iloilo kay 61st Infantry Batallion commander Lt. Col. Sisenando Magbalot Jr., iya ginpahayag nga nasapwan ang bangkay sang rebelde sa ginpatigayon nga hot pursuit operation, isa ka kilometro ang kalayuon gikan sa encounter site.
Nadiskubre sang militar ang bangkay nga ginlubong sa temporary encampment sang mga rebelde.
Suno pa kay Magbalot, padayon man ang ginahimo nga recruitment sang mga rebelde sa mga luyag magsulod sa ila hukbo ilabi na sa mga nabukid nga bahin sang probinsiya sang Iloilo.