ILOILO CITY – Indi na pagpatulan ni Sen. Antonio Trillanes ang mga anak ni Presidente Rodrigo Duterte may kaangtanan sa ginapahayag tattoo sa likod ni Davao City Vice Mayor Paolo Duterte nga suno sa senador, pamatuod nga miyembro ini sang triad.
Sa interview sang Bombo Radyo Iloilo, ginpahayag sang senador nga diversionary tactic kag panggarit-garit lang ang Facebook post ni Mayor Sara Duterte nga laragway sang tattoo nga indi man sang utod sini nga si Paolo.
Ang isyu suno kay Trillanes nga may tattoo ang Presidential son kag kahigayunan na sini nga athagon ang angot sa tattoo sa imbestigasyon sang Senado, pero wala mahimo sang bise alkalde.
Ginkadlawan lang ni Trillanes ang pabati-bati sang abogado ni Vice Mayor Duterte nga si Atty. Rainier Madrid nga basi agi ang senador rason nga gusto makita ang likod sang vice mayor.
Suno sa senador, wala niya mapinsaran ang ini nga mga butang kag nagapati ang senador nga distraction lang ini sang kampo ni Duterte.
Pabay-an niya na lang ini suno kay Trillanes kag indi pagpahanugutan ang gusto sang mga Duterte nga malikaw ang isyu.