ILOILO CITY – Kanselado ang klase sa tanan nga level sa pribado kag pampubliko nga buluthuan sa siyudad sang Iloilo bangud sang wala untat nga ulan.
Ginabaha ang bug-os nga Iloilo City, rason sang pagdeklarar ni Iloilo City acting Mayor Jose Espinosa III sang kanselasyon sang klase.
Ginpahayag sa Bombo Radyo Iloilo ni Engr. Haydee Villanueva sang City Engineer’s Office nga 19 ka mga barangay sa City Proper area kag Molo district ang ginbaha, 17 sa distrito sang Mandurriao, 15 sa Jaro, 11 sa La Paz district, lima sa Lapuz kag duha sa distrito sang Arevalo.
Suno kay Villanueva, barado ang mga drainage sa siyudad rason nga mahinay ang pagpanaog sang tubig.
Mangin ang kaiping nga probinsiya sang Guimaras ang nagkanselar sang klase sa elementarya kag high school.
Sa pihak sini, nagapabilin nga normal ang biyahe sang mga salakyan dagat gikan sa Iloilo padulong sa Guimaras, vice versa.
Normal man ang biyahe sang mga fast craft nagikan sa Iloilo padulong sa Bacolod.
Ginpahayag sa Bombo Radyo Iloilo ni Philippine Coast Guard Iloilo station head Lt. Commander Ramil Palabrica nga wala sang signal sang bagyo sa Western Visayas rason nga normal ang biyahe.
Apang ila man ginamonitor ang tiyempo bangud gina-untat ang biyahe sa ti-on sang pugada.