ILOILO CITY – Nagdepensa ang Bureau of Customs (BoC) sa akusasyon sang pila ka senador nga ang pagka-delay sang shipment sa ahensiya ang nagakahulugan na sang kurapsyon.
Sa interview sang Bombo Radyo Iloilo, ginpahayag ni Customs Deputy Commissioner Atty. Edward Dybuco nga indi hungod ang pagkaatrasar sang mga shipment.
Kun la-in ang unod sa containers kaysa gindeklarar sang mga importers, kinahanglan ini ipaidalom sa inspeksyon nga isa sa mga rason sang pagka-atrasar.
Mabudlay suno kay Dybuco ang trabaho sang BoC bangud magluwas sa pagpasiguro nga wala sang makasulod nga mga kontrabando, nagaserbe man sila nga trade facilitator.
Sa ti-on nga hugtan ang borders, makompromiso man ang trade facilitation.
Tanan nga importers suno kay Dybuco ang indi maluyag nga ipaidalom sa inspeksyon ang ila mga cargo nga rason naman kun nga-a nakompromiso ang kalidad sang inspeksyon.
Mas makapaayo suno sa Customs nga may pre-shipment inspection sa mga nagasulod nga kargamento sa pungsod.
Ginpahayag ni Dybuco nga wala sang ikasarang ang Customs nga inspeksyunon ang tanan nga cargo nga nagasulod sa Pilipinas bangud wala sila sang nagakaigo nga gamit kaangay sang X-ray machines.
Kun may pre-shipment inspection suno kay Dybuco, sa port of origin pa lang antes isakay sa barko, na-inspeksyon na ang mga containers.
Kinahanglan ini suno kay Dybuco ilabi na sa karon nga guwa-sulod lang sa pungsod ang mga produkto gikan sa China.