Pulis nabun-an sang tricycle driver bangud sa debate sa Duterte presidency

ILOILO CITY – Ginpaidalom na sa operasyon ang pulis nga nabun-an sang tricycle driver sa Barangay Lanit, Jaro, Iloilo City.
Ginkilala ang biktima nga si PO3 Ian Hermo, 33, sang Barangay Bakhaw, Mandurriao, Iloilo City kag assigned sa Kalibo, Aklan.
Sa interview sang Bombo Radyo kay Samuel Suspenia nga abyan sang biktima, nagbisita sa iya ang abyan sa River Plains Subdivision, Jaro, Iloilo City.
Suno kay Suspenia, naghagaray sila nga mag-inom upod ang suspek nga si Ricky Pabularan nga residente sang nasambit man nga lugar.
Sang mahubog, nagba-isay ang suspek kag biktima angot sa panggobyerno ni Presidente Rodrigo Duterte kag sang napikon, nagtaas ang tingog ni Pabularan nga gilayon naman ginpakalma sang pulis.
Apang sa baylo nga maghipos, nagkuwa ang suspek sang kutsilyo kag ginbuno sa dughan ang pulis.
Gilayon naman nga nagpalagyo ang suspek matapos ang insidente.