Iloilo solon nagpaathag sa pagboto pabor sa impeachment vs Chief Justice Sereno

ILOILO CITY – Nagdepensa ang pila ka mga mamalidha nga miyembro sang mayorya sa ila pagboto pabor sa impeachment case batok kay Chief Justice Ma. Lourdes Sereno.
Sa interview sang Bombo Radyo, ginpahayag ni Iloilo Third District Rep. Arthur Defensor Jr. nga indi scripted ang deliberasyon kahapon sang House Justice Committee.
Nahibaluan nga gindeklarar sang komite nga sufficient in form and substance ang impeachment case nga ginpasaka ni Atty. Lorenzo Gadon samtang ginbasura naman ang reklamo nga ginpasaka sang Volunteers Against Crime and Corruption (VACC).
Ginpanindugan sang mamalidha nga may basehan ang reklamo nga ginpasaka ni Gadon.
Si Defensor naman ang nag-indorso sa reklamo nga ginpasaka sang VACC.
Suno sa mamalidha, iya man ini ginkakibot bangud sa session lang niya nahibaluan nga siya ang maga-indorso sa reklamo sang VACC kag wala ginalauman nga mabasura ini.