ILOILO CITY – Gindepensa sang kampo ni Iloilo City Mayor Jed Patrick Mabilog ang pagpabulong sang alkalde sa luwas sang pungsod sa sakit sini nga diabetes.
Sa interview sang Bombo Radyo Iloilo, ginpahayag ni Atty. Mark Piad, legal counsel kag spokesman ni Mayor Mabilog, bangud sa tuman nga stress nga na-eksperyensiyahan sang alkalde sining nagligad nga mga inadlaw bangud sang ginapahayag pamahog sa kabuhi sini, ginpanugyanan ini sang iya mga doktor nga magpaidalom sa follow up tests ilabi na ang kidney sini.
Suno kay Piad, gusto man ni Mayor Mabilog nga mapahuway ang lawas kag paminsaron sini.
Ginpili sang alkalde nga magtinir sa iban nga pungsod matapos mag-file sang sick leave, para makapalayo sa stress kag makaupod man ang iya pamilya.
Kahapon sang ginkumpirma ni Piad nga nag-file sang sick leave si Mayor Mabilog apang ginpahayag nga wala ini sang ideya kun sa diin karon ang alkalde.
Apang ginpasiguro ni Atty. Piad nga mabalik sa pungsod si Mayor Mabilog pagkatapos sang leave sini sa Setyembre 30.