ILOILO CITY – Nag-surrender na sa mga otoridad ang magulang sang anay top drug lord sa Western Visayas nga si Richard Prevendido.
Alas-12:10 kaina sang udto sang mag-abot sa Mandurriao Police Station si Punong Barangay Remia Prevendido Gregori sang Bakhaw, Mandurriao.
Kaupod ni Gregori ang barangay secretary sini kag mga barangay kagawad samtang nag-apas naman ang abogado sini.
Ginpahayag ni C/Insp. Juan Tigaronita, OIC sang Mandurriao Police Station sa Bombo Radyo, nga ang wala untat nga pagbalik-balik sang mga otoridad sa puluy-an sang barangay kapitan ang nagtulod diri para mag-surrender.
Suno kay Tigaronita, ginpaidalom man ang punong barangay sa proseso kaangay sang iban nga drug personality nga nag-surrender.// Ginkuhaan si Gregori sang mug shot, fingerprint, affidavit kag iban pa nga data.
Ginpasiguro ni Tigaronita nga magakooperar ini sa imbestigasyon agud mapanas ang ngalan sini sa mga high value target (HVT) sang PNP.