ILOILO CITY – Indi na pagpasugtan sang pamilya Acopio nga magbalik pa sa Mindanao ang manunudlo nga si Lordvin Acopio, matapos ini mahilway sa kamot sang terorista nga Maute sa Marawi City.
Sa interview sang Bombo Radyo Iloilo, ginpahayag ni Jonalyn Acopio-Nobleza, utod ni Lordvin, naghilibion sila sa kalipay sang mahibaluan nga luwas na ang iya utod nga masobra lima ka bulan gin-hostage sang Maute.
Nagpasalamat sila suno kay Nobleza nga ginsabat ang adlaw-adlaw nila nga pangamuyo nga mahilway na si Lordvin.
Suno kay Jonalyn, luyag kuntani nila nga maistorya bisan sa telepono na lang ang iya utod agud mahibaluan ang kahimtangan sini.
Nagalaum man ang pamilya Acopio nga gilayon makapauli sa Iloilo si Lordvin.
Apang tubtob karon, wala gihapon ini makapakig-angot sa ila.
Si Acopio ang halos duha na ka tuig nga nagatudlo sa Dansalan College.