ILOILO CITY – Magasugod na sa seryoso nga training ang pambato sang Pilipinas sa Miss Asia-Pacific International 2017.
Sa exclusive interview sang Bombo Radyo Iloilo, ginpahayag ni Mutya ng Pilipinas Asia Pacific International Ilene Astrid de Vera nga sa masunod nga semana, magapadulong na ini sa Manila para sa puspusan nga training.
Suno sa Cebuana beauty queen, indi na dapat masulit ang natabo sa iya sang Mutya ng Pilipinas nga isa lang ka semana ang iya preparasyon.
Sa karon suno kay De Vera, may nagakaigo na siya nga oras kag seryoso na ang pagpanghanda para sa nagahilapit nga pageant.
Kun sa Mutya ng Pilipinas daw nagahampang lang, sa karon nakabatyag sang pressure ang 22-anyos nga marketing officer kag ramp model.
Apang dungog sa iya ang mapili nga amu ang magtiglawas sa Pilipinas.
Ika-duha pa lang ini nga major pageant ni De Vera kag dala ang bandera sang Pilipinas rason nga nakabatyag ini sang pressure.
Apang ginpasalig nga himuon ang iya tanan nga masarangan para makuha ang ika-lima nga Miss Asia-Pacific International crown para sa pungsod.
Samtang kun ang iban na-pressure, ginakabig ni De Vera nga pabor sa iya ang pag-host sang Pilipinas sang pageant subong nga tuig.
Madamo suno kay De Vera sang Pinoy nga magasuporta sa iya.
Game naman nga naghambal si De Vera sang extro sang Bombo Radyo nga “Basta Radyo… Bombo!”