ILOILO CITY – Nagdeklarar sang state of calamity ang banwa sang Carles, Iloilo bangud sang red tide.
Ginpahayag ni Carles Mayor Sigfred Betita sa interview sang Bombo Radyo Iloilo, nga mapasar sang resolusyon subong nga adlaw ang Sangguniang Bayan sang Carles para ideklarar ang banwa nga yara sa state of calamity.
Suno kay Betita, naapektuhan ang palangabuhian kag food security sang bug-os nga banwa bangud sang red tide nga nag-igo sa apat ka mga barangay sa Isla Gigantes.
Ang mga apektado nga barangay amu ang Granada, Asluman, Gabi kag Lantangan sa Gigantes Island.
Nahibaluan nga pangisda kag pagpanguha sang shellfish ang pangabuhian sang kalabanan nga mga pumuluyo sang Carles.
Nagalab-ot sa 360 ka mga pamalay ang naapektuhan sang red tide nga ginhatagan na sang bulig sang Iloilo provincial government paagi sa Provincial Agriculture’s Office kag Provincial Social Welfare and Development Office.
