ILOILO CITY – Gin-anunsyo na sang Miss Universe Organization ang venue kag petsa sang Miss Universe 2017 pageant.
Sa impormasyon nga ginapalab-ot sa Bombo Radyo Iloilo sang Filipino fashion designer nga si Kirsten Regalado, mismo si Miss Universe national director Nevin Rupear ang nagkumpirma sa iya nga hiwaton ang 66th Miss Universe pageant sa AXIS Theater sa Planet Hollywood Resort and Casino sa Las Vegas.
Ini ang patigayunon sa November 27, Lunes sang aga sa Pilipinas.
Magabalik bilang host sang pageant si Steve Harvey.
Subong pa lang ginahandaan na sang Miss Universe Organization ang pag-abot sang mga candidates sa Las Vegas.
Una na nagpabutyag sang interes ang Australia nga mag-host sang Miss Universe apang ini ang gin-offer sang Miss Universe Organization sa Pilipinas matapos ang madinalag-on nga pag-host sang pungsod sa 65th Miss Universe pageant sadtong Enero pero ginbalibaran sang Department of Tourism.