ILOILO CITY – Nagalaum ang mga transport groups sa Iloilo nga mapasugtan ang ila ginahingyo nga P3.50 nga dugang sa pamasahe.
Ginpahayag sa Bombo Radyo Iloilo ni Reymundo Parcon, presidente sang Iloilo City Loop Alliance of Jeepney Operators and Drivers Association (ICLAJODA), ang fare increase ang tuga sang sunod-sunod nga pagsaka sang presyo sang produktong petrolyo.
Nasumite na sa Land Transportation Franchising and Regulatory Board (LTFRB) ang petisyon kanday Parcon kag ginahulat ang mangin lihok sang ahensiya.
Suno kay Parcon, ila hulaton ang public hearing nga ipatawag sang LTFRB agud idepensa ang ginapangayo nga fare increase.
Kun matabo, gikan sa P6.50, mangin P10.00 na ang pamasahe sa jeep sa Iloilo.
Ginpasiguro naman ni Parcon nga nakahanda sila batunon kun pila ang maaprubahan sang LTFRB nga dugang sa pamasahe.