ILOILO CITY – Gindumdom man sang pamilya ni anay Sen. Miriam Defensor-Santiago diri sa Iloilo ang una nga death anniversary sang Ilongga nga senador.
Ang mga katiyaan kag hinablos na lang ni Sen. Miriam ang nabilin diri sa Iloilo.
Ang iloy sini nga si Mrs. Digna Palma-Defensor ang nagatinir na karon sa Metro Manila.
Ginpahayag sa Bombo Radyo ni Shenen Ledesma, isa sa mga hinablos ni Sen. Miriam, magapatigayon sang misa karon sa gab-i ang pamilya sa St. Joseph Parish, bilang pagdumdom sa anibersaryo sang pagtaliwan sang senador.
Pagasundan ini sang simple nga salo-salo upod ang mga himata kag abyan ni Sen. Santiago.
Suno kay Ledesma, ang kaisog sang iya tiya ang indi niya malipatan kag luyag nga sundan.
Apang sa karon wala pa sa pinsar sini ang pagsulod man sa pulitika kaangay sang tiya nga si Sen. Miriam Defensor Santiago.
