ILOILO CITY – All set na ang all-Filipino boy group nga JBK, para sa Boot Camp sang X Factor UK nga magasugod na buwas nga adlaw.
Sa exclusive interview sang Bombo Radyo Iloilo, ginpahayag sang grupo nanday Joshua Bulot sang Antipolo City, Bryan del Rosario sang Jaro, Iloilo City kag Kim Lawrenz Ordonio sang Malabon City, nga excited na sila apang gin-ako nga indi madali ang Boot Camp bangud kinahanglan nila mag-standout.
Bilang preparasyon, ginpahayag ni Bulot nga ginapasiguro nila nga may nagakaigo sila nga tulog para makapahuway.
Ini agud ma-preserve ang ila tingog kag indi paos pag-abot sang adlaw sang kompetisyon.
Indi pa masiguro sang JBK ang ila kantahon bangud mahibaluan lang ini sa adlaw sang Boot Camp rason nga ginatun-an nila ang tanan nga genre.
Pero kun mahatagan sang kahigayunan, mas gusto nila ang “Versace on the Floor” sang Fil-Am singer-songwriter nga si Bruno Mars.
Ginpasiguro man sang grupo nga ila ihatag ang tanan nga masarangan agud mapabugal sang mga Pinoy kag makahatag sang dungog sa pungsod.