ILOILO CITY – Suportado sang Bureau of Jail Management and Penology (BJMP) ang ginaduso sang Iloilo Provincial Police Office (IPPO) nga butangan sang signal jammer ang Iloilo District Jail sa Barangay Nanga, Pototan, Iloilo.
Ginpahayag ni BJMP-6 chief for operation and administration Jail Supt. Gilbert Peremne nga maayo ang lihok nga ginaduso ni IPPO director S/Supt. Marlon Tayaba.
Sa pagkamatuod suno kay Peremne, madugay na nila ini ginaplano apang indi gilayon mapatuman bangud dako nga kantidad ang kinahanglan sa pagbakal sang signal jammer.
Una na ginpahayag ni S/Supt. Tayaba sa Bombo Radyo nga makabulig ang signal jammer agud malimitahan ang aktibidad sang mga preso sa sulod sang Iloilo District Jail kun sa diin madata ang illegal drug transaction.
Suno kay Tayaba, ang mga nadakpan sa illegal drug operation ang nagakuha sang supply sang droga sa nasambit nga presuhan.