ILOILO CITY – Ginkilala ang isa ka pamilya nga Ilonggo bilang grand winner sa national search for Huwarang Pantawid Pamilya o modelo nga pamilya sa mga beneficiaries sang Pantawid Pamilyang Pilipino Program (4Ps).
Ang mag-asawa nga Remia kag Romulo Cabualan ang nagikan sa Tinaan Norte, Leon, Iloilo; may anom ka mga anak nga lunsay naga-eskwela.
Ang tatlo ka kabataan sang mag-asawa ang lunsay scholar sa University of the Philippines, kun kaisa nagakalipong snag gutom bangud wala ibakal sang pagkaon kag indi makapauli bangud wala sang pamasahe.
Si Remia nga isa ka barangay tanod ang magaserbe nga iloy kag amay sa ila puluy-an bangud masakiton ang bana sini.
Sa interview sang Bombo Radyo Iloilo, ginpahayag sang ginang nga wala siya naglaum nga sila ang mapilian.
Nagpasakop lang siya suno kay Mrs. Cabualan agud magserbe nga inspirasyon sa kaangay niya nga pigado.
Gintanom ni Mrs. Cabualan sa iya mga kabataan nga ang edukasyon ang dalan sa maayo nga pangabuhi kag indi luyag nga ma-eksperyensiyahan man sang mga kabataan ang kapigaduhon nga ila naagyan.
Ang mag-asawa nga Cabaluan ang katapo sang New People’s Army (NPA) sang dekada 80 kag 90.
Nagkilalahay ang mga ini sa bukid kag naagyan sini nga apisar nagabusong, nagasabak sa engkuwentro.
Apang iya napaminsar nga indi dapat magdako ang mga kabataan niya sa kinagamo rason nga nagdesisyon nga magbalik sa sabak sang gobyerno.