ILOILO CITY – Patay ang mag-amay sa Barangay Idiacan, Pandan, Antique matapos mag-away bangud sa duta.
Ginkilala ang mga biktima nga sanday Esteban Gumboc, 79, kag Inocencio Gumboc, 47, lunsay residente sang nasambit nga lugar.
Ginpahayag ni S/Insp. Karl Stephen Lee Betansos, hepe sang Pandan Municipal Police Station sa interview sang Bombo Radyo, masami naga-away ang mag-amay bangud sang duta.
Luyag sang bata nga ini ang magtala-uma sang ila duta apang wala ginpahanugutan sang amay.
Hubog si Inocencio rason nga gintago sang amay ang .38 caliber revolver sang iya bata nga ginkaakig naman sini.
Ginsulod sang bata ang puluy-an sang amay kag ginpaulanan sang labo kag buno ang iya tatay.
Nakabalos pa ang amay kag ginluthang ang iya bata nga naigo sa ulo.
Lunsay ginpadangat sa ospital ang mag-amay apang gindeklarar nga dead on arrival.