ILOILO CITY – Ginpasakaan na sang kaso nga murder ang kapin 20 ka mga katapo sang Sibalom Municipal Police Station sa probinsiya sang Antique.
Ini matapos nga nakit-an sang National Bureau of Investigation (NBI) Region 6 nga may probable cause ang reklamo batok sa mga pulis may kaangtanan sa kamatayon sang agent sang Philippine Drug Enforcement Agency (PDEA), sa buy bust operation sang tinalikdan nga Hunyo 20 sini nga tuig.
Sa interview sang Bombo Radyo kay NBI-6 director Atty. Mac Salvador, iya ginpahayag nga nagserbe nga ebidensya ang reklamo sang pamilya sang napatay nga si PDEA agent Macario Grasparil nga ginatudlo yara sa listahan sang mga drug personality sa Sibalom, Antique.
May ginpatigayon man nga imbestigasyon ang NBI-6 sa diin ila nakit-an nga may probable cause ang ginpasaka nga reklamo sang asawa ni Grasparil.
Lakip sa mga ginpasakaan sang kaso ang chief of police sang Sibalom nga si Police Senior Inspector John Philip Dinco.