ILOILO CITY – Gin-ako sang anak sang Korean businessman ang pagpatay sa kaugalingon nga amay kahapon sa ila apartment sa Barangay Cubay, Jaro, Iloilo.
Ginpahayag sa Bombo Radyo Iloilo ni PO3 Antonio Lusaya nga sa masobra tunga nga adlaw nga interogasyon sa suspek nga si Chun Hye Sun, 25, napatay sini ang amay nga si Chun Jin Soo, 57, matapos nakita nga gintayaan sang kutsilyo ang iya iloy kag utod nga babaye.
Ginkuga sang suspek ang amay gamit ang lubig kag ginlampusan sang frying pan sa ulo.
Bag-o lang nag-abot gikan sa Baguio City ang biktima sang mag-away sila sang asawa.
Apang ginpahayag ni PO3 Lusaya nga ginahibalo pa nila kun may madalom nga motibo sa pagpatay sa biktima apang limitado ang impormasyon nga ginahatag sang pamilya.
Ginahibalo man sang otoridad kun nakainom ang suspek ukon may upod ini sa paghimo sang krimen.
Wala na sang interes nga magpasaka sang kaso batok sa suspek ang pamilya.
Samtang nagapakig-angot na ang South Korean Embassy sa kapulisan sa Iloilo may kaangtanan sa kamatayon sang negosyante.
Nagtambong man sa imbestigasyon ang representante sang embahada nga direkta nga naga-report sa Consul sang South Korea.