ILOILO CITY – Ginadapatan na sang pagbulong sa ospital ang bag-o bun-ag nga lapsag nga ginbilin sang kaugalingon nga iloy sa kilid sang pader sang isa ka balay sa Zone 8, Calumpang, Molo, Iloilo City.
Ginpahayag sa Bombo Radyo Iloilo ni Ariel Ansores nga amu ang nakakita sa bata, ang dumdom niya nga kuring ang iya nabatian nga naga-gahod nga naputos sang plastic.
Apang sang iya buksan ang plastic, lapsag nga lalaki ang naputos sang plastic nga wala pa mautdan sang pusod kag nagatapik pa sa inunlan.
Suno kay Ansores, nakit-an pa sini ang iloy sang lapsag nga madasig nagpalagyo sakay sang trisikad.
Ginpahayag naman ni Marilyn Decena, midwife sa lying-in clinic, mataas ang hilanat sang lapsag kag may mga higko pa sang ini ang nasapwan.
Matapos malimpyuhan, gindala ang lapsag sa Western Visayas Medical Center.