ILOILO CITY – Gin-atubang sa media ni Police Regional Office 6 (PRO-6) director C/Supt. Cesar Hawthorne Binag ang pamilya sang top drug personality sa Western Visayas nga si Arturo Balume Sr. nga nadakpan kahapon sa Barangay Poblacion, Hinobaan, Negros Occidental.
Kaina sang aga sang nag-abot sa Camp Martin Delgado si Balume nga lider sang Balume Crime Group nga naga-operate sa probinsiya sang Iloilo kag mangin sa Negros.
Upod sini ang asawa nga si Honey Grace, bata nga si Arturo Balume Jr., umagad nga si Pamela kag ang utod ni Pamela nga si Ryan Cainglet.
Magkaupod ang lima sa isa ka salakyan sang ginserbe sang mga otoridad ang arrest warrant batok sa mga Balume.
Samtang sa Negros Occidental, negosyante ang pakilala ni Balume sa kaugalingon kag madamo ini sang ginapuy-an sa Negros Occidental.
Sa interview sang Bombo Radyo Iloilo, ginpahayag ni Iloilo Provincial Police Office (IPPO) director S/Supt. Marlon Tayaba nga nagpanguna sa operating team, nagtinir ang mga Balume sa banwa sang Hinigaran kun sa diin nagapuyo ang pamilya sang iya asawa.
May mga propiedad man ang mga Balume sa Alangilan kag naga-operate sang quarry site samtang nagakadto man ang mga ini sa Sipalay kag Cauayan.
Nagapabulong lang ini sa Hinobaan sang madakpan sang mga otoridad.
Nakuha gikan sa salakyan sang mga Balume ang duha ka armas nga kalibre .45 kag .38 caliber revolver kag 10 ka gramo sang shabu nga nagabalor P83,000.