ILOILO CITY – Ginsipa sa serbisyo sang National Police Commission ang anay pinuno sang Regional Intelligence Unit sang Police Regional Office 6 nga si Supt. Ronald Gepana nga karon assigned sa Kampo Crame.
Ini may kaangtanan sa kaso administratibo nga conduct unbecoming of a police officer.
Sa interview sang Bombo Radyo Iloilo, ginpahayag ni Napolcom 6 spokesman Allen Camering nga nangin basehan sang Napolcom en banc sa ginpaguwa nga desisyon ang pag-ako ni Gepana nga kilala sini ang anay drug lord sa Western Visayas nga si Melvin Odicta.
Ginkuwestyon sang Napolcom kun nga-a wala sang may nahimo si Gepana batok sa drug lord apisar nga ini ang yara sa intelligence unit.
Bangud sini, indi na makuha ni Gepana ang mga benepisyo sini kag indi na mahimo magtrabaho sa anuman nga ahensiya sang gobyerno.
Ginhatagan naman sang 10 ka adlaw si Gepana agud mag-apela.