ILOILO CITY – Indi pa makabalik gilayon sa ila puluy-an ang mga nag-evacuate nga residente sang Marawi City apisar gindeklarar na ang siyudad nga hilway na sa terorismo.
Ginpahayag ni Lanao del Sur Assemblyman Zia Alonto Adiong sa interview sang Bombo Radyo Iloilo nga dapat planuhon ang pagbalik sang mga Maranao sa ila puluy-an kun sa diin kinahanglan anay ang assessment sa mga residente.
Suno kay Adiong, kinahanglan ang long term nga security plan kag peace building sa Marawi gani ila hugtan ang security protocol para sa pagbalik sang mga evacuees.
Nagapakig-angot naman sila suno kay Adiong sa Department of Interior and Local Government (DILG) kag mga punong barangay sa Marawi agud makilala ang mga tunay nga residente sang siyudad antes ang mga ini pabalikon sa ila puluy-an.
Kinahanglan masiguro suno kay Adiong nga indi masimpunan sang iba nga elemento nga posible magsabwag na naman sang kalakasan ang mga evacuees.